"Prezident İlham Əliyevin İslam Əməkdaşlıq Təşkilatının Baş katibi İsmayıl Ould Şeyx Əhməd və ICESCO-nun Baş direktoru Səlim bin Məhəmməd əl-Maliki ilə görüşləri Azərbaycanın İslam dünyası ilə münasibətlərinin siyasi, humanitar və mənəvi əhəmiyyətini bir daha ön plana çıxarır. Bu görüşlər ölkəmizin müsəlman dövlətləri arasında həmrəyliyin gücləndirilməsi, ortaq mədəni irsin qorunması və beynəlxalq əməkdaşlığın genişləndirilməsi istiqamətində həyata keçirdiyi siyasətin növbəti təzahürüdür".

Azərbaycan Parlamentinin təmsilçisi Könül Nurullayeva Musavat.com-a açıqlamasında bildirib.

Onun sözlərinə görə, Cənubi Qafqazda davamlı sülhün və sabitliyin təmin olunması istiqamətində Prezident İlham Əliyevin səylərinə dəstək ifadə olunması Azərbaycanın regional siyasətinə verilən önəmi göstərir: "Azərbaycan müstəqilliyini bərpa etdikdən sonra üzv olduğu ilk beynəlxalq təşkilatlardan biri İƏT olub. Bu il ölkəmizin təşkilata üzvlüyünün 35 ili tamam olur. Ötən dövrdə Azərbaycan İslam dünyasının birliyini və həmrəyliyini dəstəkləyib, dini-mədəni irsin qorunması və sivilizasiyalararası dialoqun inkişafı istiqamətində ardıcıl fəaliyyət göstərib. 2017-ci ilin ölkəmizdə “İslam Həmrəyliyi İli” elan edilməsi və həmin il IV İslam Həmrəyliyi Oyunlarının keçirilməsi bu siyasətin mühüm nümunələrindəndir.

Azərbaycanın İslam dünyasındakı nüfuzunu gücləndirən əsas istiqamətlərdən biri də mədəni irsin qorunmasıdır. İşğaldan azad edilmiş ərazilərdə dağıdılmış məscidlərin bərpası, tarixi-dini abidələrin yenidən qurulması dövlətimizin milli-mənəvi dəyərlərə sadiqliyini nümayiş etdirir. Heydər Əliyev Fondunun, o cümlədən Leyla Əliyevanın dəstəyi ilə həyata keçirilən humanitar, təhsil və mədəniyyət layihələri də bu missiyanın beynəlxalq miqyasda genişlənməsinə töhfə verir".

Deputat onu da qeyd edib ki, Azərbaycan eyni zamanda İslamofobiya ilə mübarizənin beynəlxalq gündəlikdə təşviqinə xüsusi önəm verir:

“Prezident İlham Əliyevin təşəbbüsü ilə keçirilən Ümumdünya Mədəniyyətlərarası Dialoq Forumu müxtəlif dinlər və mədəniyyətlər arasında qarşılıqlı anlaşmanın gücləndirilməsinə xidmət edir. İslam dünyasına qarşı yönələn dezinformasiya və qarayaxma kampaniyalarına qarşı İƏT üzvü olan dövlətlərin birgə fəaliyyətinin gücləndirilməsi də müasir dövrün vacib tələblərindəndir. Ölkəmizin təşkilat çərçivəsində artan rolunun göstəricilərindən biri də beynəlxalq tədbirlərə ev sahibliyidir”.

K.Nurullayeva xüsusi olaraq vurğuladı ki, Şuşanın İƏT-in 2026-cı il üzrə turizm paytaxtı seçilməsi Azərbaycanın mədəni və turizm potensialının tanıdılması baxımından əhəmiyyətlidir: "2027-ci il iyunun 23-24-də Bakıda İslam Zirvə Konfransının 16-cı sessiyasının keçirilməsi və Azərbaycanın təşkilatda sədrliyi üzərinə götürməsi isə ölkəmizə İslam dünyasında siyasi dialoqun və əməkdaşlığın genişləndirilməsi üçün yeni imkanlar yaradacaq.

Bütün bunlar göstərir ki, Azərbaycan müasir dünyəvi inkişaf modelini İslamın mənəvi dəyərlərinə sadiqliklə uzlaşdıraraq həm regional, həm də qlobal səviyyədə mühüm rol oynayır. Ölkəmizin həyata keçirdiyi siyasət İslam həmrəyliyinin möhkəmləndirilməsinə, humanizm ideyalarının təşviqinə və xalqlar arasında qarşılıqlı etimadın artırılmasına xidmət edir. Azərbaycanın 2027-ci ildə İslam Zirvə Konfransına ev sahibliyi etməsi bu istiqamətdə yeni təşəbbüslərin həyata keçirilməsi və beynəlxalq mövqeyimizin daha da gücləndirilməsi baxımından mühüm perspektivlər yaradır".