NATO ölkələri son iki onilliyin ən genişmiqyaslı hərbi planlaşdırma rezonansına start verərək bütün resurslarını tək bir ssenariyə — Avropada Rusiya təcavüzünün dəf edilməsinə yönəldir.

Musavat.com xəbər verir ki, "Politico" nəşrinin Alyansdakı yüksək rütbəli diplomatik mənbələrə istinadən yaydığı məlumata görə, NATO-nun 32 üzv dövləti hərbi doktrinada köklü dəyişiklikləri nəzərdə tutan yeni "Siyasi İstiqamət" (Political Direction) layihəsini müzakirə edir. Yeni strategiyaya əsasən, Alyans Şərqi tərəfdaşlıq, Yaxın Şərq və ya Afrikada lokal böhranların idarə olunması kimi regional missiyalardan imtina edir. Müttəfiqlərdən artıq eyni vaxtda həm Avropada böyük müharibəyə hazırlaşmaq, həm də xaricdəki lokal hərbi əməliyyatlara qoşun ayırmaq tələb olunmayacaq.

NATO-nun bütün canlı qüvvəsi, texnikası, raket arsenalları və maliyyə planlaşdırılması istisnasız olaraq Avropa qitəsinin kollektiv müdafiəsinə səfərbər ediləcək.

Qeyd olunur ki, bu strateji dönüş Alyansın Ukraynadakı müharibə təcrübəsindən çıxardığı acı nəticələrin birbaşa təzahürüdür.

NATO komandanlığı Rusiyanın hərbi-sənaye potensialının bərpa olunma sürətini nəzərə alaraq, yaxın illərdə Şərqi Avropa cinahında baş verə biləcək birbaşa hərbi toqquşmanı yeganə real təhlükə ssenarisi kimi qəbul edir və bütün müdafiə sənayesini "müharibə relslərinə" keçirir.