“Türk əsri: Dildə, fikirdə, işdə birlik" - Zirvədə müzakirə ediləcək MÖVZULAR
Türk Dövlətləri Təşkilatının (TDT) XIII Zirvə görüşündə Orta Dəhlizin inkişafı, gömrük prosedurlarının sadələşdirilməsi, ticarət dövriyyəsinin artırılması, rəqəmsal iqtisadiyyat və kənd təsərrüfatında birgə layihələr əsas müzakirə mövzuları olacaq. Oktyabrın 29-30-da Ankarada keçiriləcək görüşdə təşkilata sədrlik Azərbaycandan Türkiyəyə keçəcək.
"AzPolitika" modern.az-a istinadən xəbər verir ki, Türkiyə Prezidenti Rəcəb Tayyib Ərdoğanın ev sahibliyi ilə keçiriləcək zirvənin builki mövzusu “Türk əsri: Dildə, fikirdə, işdə birlik”dir. Oktyabrın 29-da TDT Xarici İşlər Nazirləri Şurasının iclası, ertəsi gün isə dövlət başçılarının görüşü keçiriləcək.
Zirvədə türk dövlətləri arasında siyasi əməkdaşlığın dərinləşdirilməsi, regional və beynəlxalq məsələlər, Türk Dünyası 2040 Vizyonunun icrası və təşkilatın institusional imkanlarının gücləndirilməsi müzakirə olunacaq. İştirakçıların bir sıra qərar və sənədləri, o cümlədən Ankara Bəyannaməsini qəbul etmələri gözlənilir.
Orta Dəhliz və ticarət maneələri masada
İqtisadi gündəliyin əsas istiqamətlərindən biri türk dövlətləri arasında nəqliyyat əlaqələrinin genişləndirilməsi olacaq. Orta Dəhlizin imkanları, sərhəd-keçid məntəqələrində prosedurların sadələşdirilməsi, gömrük əməliyyatları və logistika xərclərinin azaldılması müzakirə ediləcək.
Bakı-Tbilisi-Qars dəmir yolu xətti də regionda nəqliyyat bağlantılarının inkişafı baxımından əhəmiyyət daşıyır. Bu istiqamətdə əməkdaşlığın genişləndirilməsi türk dövlətləri arasında yükdaşımaların və ticarətin artırılması üçün əlavə imkanlar yarada bilər.
Ticarət əlaqələrinin miqyası da zirvənin iqtisadi əhəmiyyətini göstərir. Türkiyənin Azərbaycan, Qazaxıstan, Qırğızıstan və Özbəkistanla ticarət dövriyyəsi 2025-ci ildə 17 milyard dollara yaxınlaşıb. Həmin il Türkiyənin bu ölkələrə ixracı 9,6 milyard dollar, idxalı isə 7,3 milyard dollar təşkil edib.
Rəqəmsal iqtisadiyyat və kənd təsərrüfatı
Zirvədə elektron ticarətin, rəqəmsal xidmətlərin və sərhədlərarası məlumat mübadiləsinin inkişafı da diqqət mərkəzində olacaq. TDT ölkələri arasında rəqəmsal iqtisadiyyat sahəsində tərəfdaşlıq sazişinin tətbiqi bu sahədə maneələrin azaldılmasına və iqtisadi əlaqələrin asanlaşdırılmasına yönəlib.
Kənd təsərrüfatında məlumat mübadiləsi və ağıllı texnologiyaların tətbiqi məqsədilə TDT Rəqəmsal Kənd Təsərrüfatı Məlumat Platformasının yaradılması layihəsi də gündəmdədir.
Kosmos sahəsində əməkdaşlığın davam etdirilməsi, o cümlədən birgə kubsat layihəsi üzrə işlərin irəli aparılması da təşkilatın texnoloji əməkdaşlıq istiqamətləri sırasındadır.
Enerji, investisiya və institusional əməkdaşlıq
Dövlət başçıları enerji, investisiya, mədəni-humanitar əlaqələr və təşkilatın institusional inkişafı sahələrində əməkdaşlığın perspektivlərini də nəzərdən keçirəcəklər. Zirvə çərçivəsində türk dünyasının işgüzar dairələrinin görüşləri, iqtisadi əlaqələrin genişləndirilməsi və yeni əməkdaşlıq imkanlarının müzakirəsi planlaşdırılır.
Türkmənistan Prezidenti Sərdar Berdiməhəmmədovun oktyabrın 30-da Türkiyənin işgüzar dairələrinin nümayəndələri ilə görüşü də nəzərdə tutulur.
Qeyd edək ki, TDT-nin tamhüquqlu üzvləri Azərbaycan, Türkiyə, Qazaxıstan, Qırğızıstan və Özbəkistandır. Türkmənistan, Macarıstan və Şimali Kipr Türk Respublikası təşkilatda müşahidəçi statusuna malikdir. Zirvədə Azərbaycan təşkilata sədrliyi Türkiyəyə təhvil verəcək.
