Hərbi alyans döyüş və əməliyyat hazırlığını yoxlayır; "Mi-17"lər beynəlxalq missiyalara yol açır

Azərbaycan Hərbi Hava Qüvvələrinə məxsus iki ədəd "Mi-17-1V" helikopterinin NATO standartlarına uyğunluğunun qiymətləndirilməsi üzrə təlimlərə start verilib. Müdafiə Nazirliyinin məlumatına görə, təlimlər NATO-nun “Əməliyyat imkanları konsepsiyası” proqramı çərçivəsində keçirilir. Tədbir zamanı təlimlərin məqsədləri, təhlükəsizlik qaydaları və digər mühüm məsələlər barədə ətraflı məlumat verilib.

Proqrama uyğun olaraq, təlim poliqonunda döyüş atışları üzrə tapşırıqlar yerinə yetirilib, həmçinin yanğınsöndürmə üzrə praktiki məşğələlər keçirilib. Bununla yanaşı, hərbi qulluqçuların fərdi bacarıqlarını yoxlamaq məqsədilə nəzəri və praktiki sınaqlar təşkil olunub, müvafiq yoxlamalar aparılıb.

Qeyd edək ki, oktyabrın 29-dək davam edəcək təlimlərin əsas məqsədi Azərbaycan Hərbi Hava Qüvvələrinin iki "Mi-17-1V" helikopterindən ibarət qrupunun əməliyyat imkanlarının NATO standartlarına uyğunluğunu yoxlamaq və sertifikatlaşdırmaqdır.

"Mi-17-1V" sovet dövründə yaradılmış "Mi-8" helikopter ailəsinin modernləşdirilmiş, hərbi nəqliyyat və döyüş dəstəyi imkanlarına malik versiyasıdır. Bu helikopter şəxsi heyətin, hərbi yüklərin və sursatın daşınması, yaralıların təxliyəsi, desant əməliyyatları və zəruri konfiqurasiyada atəş dəstəyi üçün istifadə oluna bilər. Model xüsusilə isti hava və yüksək dağlıq ərazilərdə işləmək imkanları ilə seçilir. Azərbaycan Hərbi Hava Qüvvələrinin bu tip helikopterlərdən istifadə etməsi də onların əməliyyat imkanlarının beynəlxalq standartlar əsasında qiymətləndirilməsi baxımından əhəmiyyətlidir.

Bu helikopterin əsas üstünlüyü çoxməqsədliliyidir. Azərbaycan kimi dağlıq əraziləri, mürəkkəb relyefi və müxtəlif əməliyyat istiqamətləri olan ölkə üçün hava vasitəsilə şəxsi heyətin və təchizatın daşınması, yaralıların operativ təxliyəsi mühüm əhəmiyyət daşıyır. Bununla yanaşı, helikopterlərin NATO standartları üzrə qiymətləndirilməsi şəxsi heyətin hazırlığının, təhlükəsizlik prosedurlarının və beynəlxalq hərbi bölmələrlə qarşılıqlı fəaliyyət qabiliyyətinin təkmilləşdirilməsinə xidmət edir.

Səxavət Məmməd

Hərbi ekspert Səxavət Məmməd “Yeni Müsavat”a bildirdi ki, Azərbaycanın NATO ilə əməkdaşlığı uzun illərdir ki, “Sülh naminə tərəfdaşlıq” proqramı çərçivəsində uğurla davam etdirilir: “1994-cü ildən start götürən bu tərəfdaşlıq çərçivəsində Azərbaycan Ordusu Kosovoda, İraqda və Əfqanıstandakı beynəlxalq sülhməramlı missiyalarda NATO qüvvələri ilə çiyin-çiyinə xidmət edərək zəngin birgə əməliyyat təcrübəsi toplayıb. Bu tarixi əməkdaşlıq təkcə şəxsi heyətin təcrübə qazanmasına deyil, həm də ordumuzun mərhələli şəkildə müasir standartlara uyğunlaşmasına zəmin yaradıb. Bu baxımdan, Azərbaycan Hərbi Hava Qüvvələrinə məxsus Mi-17-1V helikopter qrupunun NATO-nun "Əməliyyat İmkanları Konsepsiyası" proqramı çərçivəsində qiymətləndirilməsi həmin tərəfdaşlığın davamıdır. Burada söhbət bütün helikopter parkının deyil, sırf iki ədəd "Mi-17-1V" helikopterindən ibarət konkret qrupun və onun heyətinin NATO standartlarına uyğunluğunun yoxlanılmasından gedir. Sınaqlar zamanı bu "Mi-17-1V" helikopterlərinin və heyətinin nəzəri bilikləri, rabitə prosedurları, uçuş təhlükəsizliyi qaydaları, eləcə də praktiki atış və yanğınsöndürmə tapşırıqları kompleks şəkildə qiymətləndirilir. Praktiki baxımdan bu yoxlama sertifikatlaşdırılacaq həmin "Mi-17-1V" helikopter qrupunun gələcəkdə NATO və ya digər tərəfdaş ölkələrin rəhbərlik etdiyi sülhməramlı, humanitar və ya fəlakətlərin aradan qaldırılması üzrə beynəlxalq əməliyyatlarda heç bir texniki və prosedur maneəsi olmadan iştirak etməsinə imkan yaradır. Çoxmillətli missiyalarda müxtəlif ölkələrin aviasiya vasitələrinin eyni rabitə və idarəetmə protokolları ilə işləməsi həlledici əhəmiyyət daşıyır. Strateji müstəvidə isə sovet mənşəli bazaya malik "Mi-17-1V" helikopterlərinin NATO standartları üzrə qiymətləndirilməsi Azərbaycanın mövcud aviasiya texnikasını beynəlxalq tələblərə uyğunlaşdırmaq bacarığını nümayiş etdirir. Yekun olaraq, bu qiymətləndirmə ordunun bütün parkını əhatə etməsə də, konkret ayrılmış "Mi-17-1V" qrupunun beynəlxalq missiyalara hazır olmasını və şəxsi heyətin peşəkar standartlarının yüksəldilməsini təmin edir".