Rusiyada 7 noyabr – Oktyabr inqilabının ildönümü ərəfəsində Kommunist Partiyasının (KPRF) ənənəvi aksiyaları ilə bağlı problemlər yaranıb. Partiya Moskvada Karl Marksın abidəsi önündə mitinq və Leninin mavzoleyi istiqamətində yürüş keçirməyi planlaşdırsa da, tədbirin taleyi hələ də qeyri-müəyyəndir.

“Nezavisimaya qazeta”nın məlumatına görə, məhdudiyyətlər paytaxtla yanaşı, Tümen, Omsk, Voloqda, Çerepovets və Kostromada da müşahidə olunur. Yerli hakimiyyət orqanları aksiyalara müxtəlif əsaslarla icazə verməyib, bəzi şəhərlərdə isə kommunistlərə əlverişsiz məkanlar təklif edilib.
KPRF nümayəndəsi Sergey Obuxov hesab edir ki, hakimiyyət partiyanın küçə fəallığını məhdudlaşdırmağa çalışır. Siyasi analitik Konstantin Kalaçev isə bildirir ki, hakimiyyət tarixi anım mitinqlərinin cari siyasi etirazlara çevrilməsindən ehtiyatlanır.
Onun fikrincə, kommunistlər də seçkilərdən sonra hakimiyyətlə açıq qarşıdurmaya getməkdə maraqlı deyillər.

Bəs 7 noyabr aksiyalarına niyə icazə verilmir? Kreml kommunistlərin küçələrə çıxmasından, yoxsa bu mitinqlərin daha geniş narazılıq platformasına çevrilməsindən ehtiyatlanır? KPRF-nin bugünkü Rusiyada real müxalifət potensialı nə qədərdir?

Professor Qabil Hüseynli Musavat.com-a açıqlamasında xatırladıb ki, bundan öncə kommunistlərin tədbiri müharibə əleyhdarlarının aksiyasına çevrilmişdi. Onun sözlərinə görə, hakimiyyət üçün gözlənilməz vəziyyət yaranmışdı deyə indi ciddi bir tərəddüd var: "Rusiyada müharibə şəraiti sərbəst toplaşmaqla bağlı məhdudiyyəti daha da artırıb. Hətta adi yığıncaqlardan da ehtiyat edirlər. Hakimiyyətə elə gəlir ki, spontan hadisələr baş verə bilər. Sonuncu məsələ də bir növ dərs oldu. Putin iqtidarı gözləmirdi ki, müharibə əleyhinə şüarlar səslənsin. Bu, rəsmi təbliğata ziddir. Kreml elə görüntü yaradıb ki, guya xalq hərbi əməliyyatları dəstəkləyir. Ona görə narahatlıq və tərəddüd var".

Qabil Hüseynli ikinci səbəb kimi təhlükəsizlik məsələsini görür: "Ukrayna PUA-ları ucqarlara belə gedib çatır. Rusiyanın ağıla gəlməyən yerlərində zavodlar vurulmaqdadır. Eyni zamanda, Moskva səması bir neçə dəfə tamamilə bağlanıb. Yadınızdadırsa, 9 May paradı da böyük məhdudiyyətlərlə keçirilmişdi. Zənnimcə, kommunistlərin müxtəlif şəhərlərdə sosialist inqilabını qeyd etməyə hələ tam razılıq verilməməsi həm də bununla bağlıdır. Şübhəsiz ki, hansısa tədbirlər keçiriləcək. Lakin müharibə şəraitində olan ölkə üçün yığıncaqlar təhlükəlidir. Hətta son illər Yeni il şənlikləri də demək olar ki, keçirilmir. Yəni həm siyasi, həm təhlükəsizlik amilləri var və hər ikisi müharibə ilə əlaqədardır".
Professor hesab edir ki, Rusiyanı düşdüyü vəziyyətdən elə özü çıxara bilər: “Müharibənin uzanması yaxşı heç nə vəd etmir. Kreml "xüsusi hərbi əməliyyat" dediyi təcavüzkar hərəkətlərini dayandırmasa, ölkə ərazisində təhlükəsiz, normal həyat olmayacaq. Onsuz da rus qoşunları sürətli irəliləyə bilmir və bundan sonra böyük ərazi ilhaqı mümkün deyil. Hətta Lukaşenko da etiraf etdi ki, hər iki tərəf yorulub. Odur ki, dayanmaq vaxtıdır. Əslində, Rusiyanın bu müharibəni "xüsusi hərbi əməliyyat" adlandırması da gülüş doğurur. Əgər elədirsə, bu əməliyyat xüsusidir deyə tezliklə başa çatmalıydı. Axı 5 il xüsusi əməliyyat ola bilməz. Bu da nəticə etibarı ilə Rusiyanın içərisində destabilizasiya yaradır".