İranla əlaqəli ən azı 4 gəmi Оman körfəzində yerləşən strateji sualtı telekommunikasiya kabellərinin yaxınlığında müşahidə edilib.

Musavat.com xəbər verir ki, bu barədə dəniz kəşfiyyatı və analitikası üzrə ixtisaslaşmış “Windward” şirkəti məlumat yayıb.

Analitiklərin qeyd etdiyinə görə, gəmilərin mühüm rabitə infrastrukturu üzərində peyda olması qlobal internet və telekommunikasiya xətlərinin izlənilməsi, yaxud böyük diversiya aktına hazırlıq şübhələrini artırıb və beynəlxalq aləmdə ciddi həyəcan yaradıb.

Kabellərə zərbə vurularsa, nə baş verəcək?

Bundan əvvəl İran İslam İnqilabı Keşikçiləri Korpusu (SEPAH) Hörmüz boğazından keçən və qlobal internetin fəaliyyətində mühüm rol oynayan 7 əsas sualtı internet kabelinin mümkün hərbi qarşıdurma zamanı hədəfə çevrilə biləcəyi barədə xəbərdarlıq edib.

SEPAH nümayəndələrinin açıqlamasına görə, ABŞ və müttəfiqlərinin İrana qarşı hərbi təzyiqləri və infrastrukturuna qarşı addımları davam edərsə, Tehran Hörmüz boğazındakı sualtı kommunikasiya xətlərini hədəf ala bilər.

Həmçinin "Amazon", "Meta" və "Microsoft" kimi texnologiya nəhənglərindən bu tranzit xətlərə görə haqq alınması məsələsi də gündəmə gətirilib.

Beynəlxalq Kabellərdən Mühafizə Komitəsinin (ICPC) məlumatına görə, Hörmüz boğazı qlobal internet buraxılış zolağının 1%-dən azını daşısa da, bu marşrut birbaşa Körfəz ölkələrinin (Qətər, Bəhreyn, Küveyt, BƏƏ və İraq) dünya internet şəbəkəsinə bağlanmasında kritik rol oynayır.

Kabellər zədələnsə, ilk saatlarda tamamilə qlobal internet qıtlığı yaşanmasa da, ciddi sürət ləngimələri, BGP trafik axınındakı dəyişikliklər, bulud xidmətlərində, yüksək tezlikli maliyyə əməliyyatlarında və videobağlantılarda kəskin problemlər yaranacaq.

Peyk rabitəsi bu böyük trafik tutumunu əvəz edə bilməyəcək və yalnız dövlət/hərbi ehtiyaclara bəs edəcək.

Hərbi təhdidlər, hüquqi mübahisələr və sığorta məhdudiyyətləri səbəbindən zədələnmiş sualtı kabellərin bərpası aylarla vaxt ala bilər.