“Ermənistanla Azərbaycan arasında bərqərar olmuş sülh ideal deyil. Aydındır ki, hələ də həllini gözləyən humanitar məsələlər qalmaqdadır”.

“AzPolitika” xəbər verir ki, bunu Ermənistanın Baş naziri Nikol Paşinyan bu gün Türkmənistanda keçirilən MDB Dövlət Başçıları Şurasının növbəti iclasındakı çıxışında deyib.

“Təəssüf ki, zaman-zaman həm Ermənistan, həm də Azərbaycan rəsmi səviyyədə də daxil olmaqla mənfi əhval-ruhiyyənin alovlanması ilə qarşılaşır. Lakin bu hadisələr, hətta sual doğursa belə, artıq davamlı sülhün mövcudluğunu şübhə altına almır. Sadəcə olaraq başa düşməliyik ki, 30 ildən çox davam edən münaqişəyə bir anda son qoymaq olmaz. Bu, vaxt və ardıcıllıq tələb edəcək.

Çoxlu itkilər, əzablar, düşmənçilik, mübahisələr və uzun illər davam edən münaqişədən sonra Ermənistanla Azərbaycan arasında dinc yanaşı yaşamağın artıq mümkün olmadığı qənaəti var idi. Bu baxımdan, Azərbaycan Prezidenti ilə birlikdə və beynəlxalq tərəfdaşlarımızın dəstəyi ilə qeyri-mümkün olana nail olduq və bu sülhü hər gün qorumalıyıq, çünki bu nailiyyət, ilk növbədə, Ermənistan və Azərbaycan xalqlarına, müstəqilliyinin möhkəmlənməsinə xidmət edir. Ermənistan və Azərbaycan, eləcə də Ermənistan və Azərbaycanın gələcək nəsilləri təkcə dinc yanaşı yaşamaq üçün deyil, həm də ortaq maraqlara əsaslanan əməkdaşlıq və mehriban qonşuluq üçün tarixi fürsət əldə ediblər.

Bu tarixi fürsəti, daha doğrusu, bu tarixi reallığı yaradan Alma-Ata Bəyannaməsi və onun dirçəlişi oldu. Biz sadəcə olaraq bu reallığı inkişaf etdirməli, tərəflərin bir-birinin suverenliyini, ərazi bütövlüyünü, beynəlxalq sərhədlərin toxunulmazlığını və siyasi müstəqilliyini qeyd-şərtsiz tanıdığı və hörmət etdiyi, tərəflərin bu gün və əbədi olaraq bir-birinə qarşı açıq və ya gizli ərazi iddialarının olmadığı gələcəyə baxmalıyıq… Biz bu yolla irəliləyirik və ümid edirəm və əminəm ki, birlikdə çalışaraq son məqsədimizə - Ermənistan və Azərbaycan arasında sülh müqaviləsinin imzalanmasına və təsdiqlənməsinə nail olacağıq", - deyə Paşinyan bildirib.

Qeyd edək ki, Türkmənistandakı görüşdə Belarus Prezidenti Aleksandr Lukaşenko, Nikol Paşinyan və İlham Əliyev arasında yüksək əhval-ruhiyyədə dialoqu əks etdirən maraqlı görüntülər yayımlanıb. Həmin görüntülər Ermənistandakı qatı millətçi və revanşist müxalifəti tərəfindən birmənalı qarşılanmayıb. Həm də ona görə ki, son zamanlara qədər Paşinyan və Lukaşenko arasında tez-tez söz atışmalarına və qarşılıqlı ittihamlara rast gəlinirdi.

C.Məmmədli

“AzPolitika.info”